Prezident YUNESKOda ta’lim va madaniyat tashabbuslarini ilgari surdi
Samarqandda o‘tkazilgan YUNESKO Bosh konferensiyasida O‘zbekiston Prezidenti Shavkat Mirziyoyev ta’lim, ilm-fan, madaniyat va madaniy merosni rivojlantirishga qaratilgan bir qator muhim tashabbuslarni ilgari surdi. Bu haqda Zamin.uz xabar berdi.
U har bir bola, jumladan, maxsus ehtiyojga ega bolalar uchun teng ta’lim olish imkoniyatini yaratish muhimligini ta’kidladi. Shuningdek, Prezident YUNESKOning inklyuziv ta’lim bo‘yicha maxsus platformasini tashkil etishni va mamlakatlar o‘rtasida tajriba almashishni ta’minlash maqsadida Kasbiy ta’lim bo‘yicha Jahon sammitini o‘tkazishni taklif qildi.
Davlat rahbari ta’lim tizimiga sun’iy intellektni joriy etish va "Sun’iy intellekt – maktab" loyihasini yaratish tashabbusini ham ilgari surdi. Shuningdek, muzeylarda sun’iy intellektning etikasini muhokama qilish uchun xalqaro ekspertlar forumini tashkil etish rejalashtirilayotgani ma’lum qilindi.
An’anaviy raqslar, musiqa va hunarmandchilik kabi nomoddiy madaniy merosni asrab-avaylash maqsadida Prezident 19-noyabrni Hujjatli merosning xalqaro kuni deb e’lon qilishni va Xalqaro raqamli meros institutini tashkil etishni taklif etdi. Buxoroda Hunarmandchilik va xalq ijodiyoti bo‘yicha Xalqaro kongress o‘tkazilishi belgilangan.
Shuningdek, ayollar yetakchiligini rivojlantirish maqsadida YUNESKOning Ayollar yetakchiligi akademiyasini tashkil etish va ta’lim, ilm-fan hamda madaniyat sohalarida Ayollar global forumini o‘tkazish taklif qilindi. Prezident Mirziyoyev "YUNESKO ekologik poytaxti" tashabbusini ilgari surib, "yashil" dasturlarni qo‘llab-quvvatlash va iqlim o‘zgarishiga mos sharoitda madaniy merosni saqlash bo‘yicha xalqaro simpozium o‘tkazishni taklif qildi.
Yoshlarni noto‘g‘ri ma’lumotlar va manipulyatsiyalardan himoya qilish uchun bolalar madaniy kontenti bo‘yicha Xalqaro festivalni tashkil etish va Media savodxonlikni rivojlantirish bo‘yicha Kompleks strategiyani ishlab chiqish tashabbuslari ham ilgari surildi (manba: zamin.uz).
