Samarqand shahrida O‘zbekiston Prezidenti Shavkat Mirziyoyev UNESCO Bosh direktori Odri Azulega "Do‘stlik" ordenini topshirdi. Bu haqda Zamin.uz xabar berdi.
Ushbu yuksak mukofot Odri Azulenning fan, ta’lim va madaniyat sohalarida hamkorlikni rivojlantirishga qo‘shgan hissasi va O‘zbekistonning boy madaniy merosini dunyoga targ‘ib qilgani uchun taqdim etildi. Uchrashuv davomida Prezident va UNESCO rahbari O‘zbekiston hamda tashkilot o‘rtasidagi hamkorlikni yanada mustahkamlash masalalarini muhokama qilishdi.
Odri Azule Prezidentni UNESCO Bosh konferensiyasining 43-sessiyasini muvaffaqiyatli o‘tkazgani bilan samimiy tabrikladi. Mazkur sessiya 40 yillik tanaffusdan so‘ng ilk bor Parijdan tashqarida, Samarqandda o‘tkazilayotgani alohida ahamiyat kasb etmoqda.
U tadbirning yuqori saviyada tashkil etilgani va dasturining boyligi haqida iliq fikr bildirdi. Konferensiya doirasida bir qator muhim tadbirlar o‘tkazilishi rejalashtirilgan.
Jumladan, UNESCOning Maktabgacha ta’lim bo‘yicha mintaqaviy markazi ishga tushirilishi, Beruniy mukofotining topshirilishi, Samarqandning 3000 yillik yubileyini nishonlash, shuningdek, muzeylar, sun’iy intellekt va gender masalalariga bag‘ishlangan forumlar tashkil etilishi kutilmoqda. Bu tadbirlar xalqaro hamkorlikni rivojlantirish va O‘zbekistonning madaniy merosini yanada kengroq tanitishga xizmat qiladi.
