Toshkentda Radisson mehmonxonasi qurilishi boshlandi
Xalqaro mehmonxona tarmog‘i Radisson Hotel Group va MANAR Development kompaniyasi Toshkent markazida yangi mehmonxona ochish rejalari bo‘yicha anglashuv memorandumini imzoladi. Bu haqda Zamin.uz xabar berdi.
Ushbu mehmonxona Chorsu MANAR deb nomlangan ko‘p funksiyali majmuaning bir qismi bo‘ladi. Mazkur majmua ilgari “Chorsu” mehmonxonasi joylashgan hududda qurilmoqda va shahar makonini keng ko‘lamli qayta qurishni o‘z ichiga oladi.
Umumiy maydoni 100 ming kvadrat metrdan ortiq bo‘lgan bu hududda mehmonxona xonalari, ofislar, turar joy apartamentlari, savdo va ko‘ngilochar markazlar joylashishi rejalashtirilgan. Ushbu loyiha uchun 100 million dollardan ortiq sarmoya jalb etilishi ko‘zda tutilgan.
MANAR Development bosh direktori Davron Fayzimatovning so‘zlariga ko‘ra, kompaniya bir nechta xalqaro mehmonxona operatorlari bilan muzokaralar olib borgan. Radisson brendi xizmatlari sifati va narxi o‘rtasidagi moslik tufayli tanlangan.
Fayzimatovning ta’kidlashicha, Radisson brendi ostidagi mehmonxona Chorsu MANAR majmuasining asosiy tarkibiy qismi bo‘lib, uni xalqaro miqyosda e’tiborga molik ob’ektga aylantiradi. Shuningdek, majmua shahar uchun yangi ramziy arxitektura ansambli bo‘lib, yuqori xizmat darajasi va rivojlangan infratuzilma taklif qiladi.
Yangi mehmonxona majmuaning asosiy binosida joylashib, 14 qavatni egallaydi. Bu yerda mehmonlar uchun alohida kirish eshigi, ikki qavatli avtoturargoh va to‘rt yulduzli mehmonxona talablariga mos infratuzilma tashkil etiladi.
Radisson Hotel Group biznesni rivojlantirish bo‘yicha vitse-prezidenti Devid Jenkinsning aytishicha, kompaniya uzoq yillardan buyon ushbu hududga qiziqish bildirgan. Chorsu MANAR loyihasi o‘z ko‘lami va salohiyati bilan kompaniya mezonlariga to‘liq mos keladi.
Ma’lum qilinishicha, “Chorsu” mehmonxonasining asl binosi 1982 yilda qurilgan va dastlab “Moskva” nomi bilan tanilgan. 23 qavatli bino o‘z vaqtida Toshkent arxitekturasining ramziy ob’ektlaridan biri bo‘lgan.
Biroq, 2000-yillarda bino rekonstruksiya uchun yopilgan va qayta tiklash ishlari amalga oshirilmagan. Yangi loyiha esa ushbu hududni zamonaviy majmuaga aylantirishga qaratilgan.
