O‘zbekistonning 23 oliygohi QS Asia reytingida

2026 yil uchun QS Asia University Rankings reytingida O‘zbekistonning 23 ta oliy ta’lim muassasasi o‘z o‘rnini topdi. Bu haqda Zamin.uz xabar berdi.

Mazkur reyting natijalariga ko‘ra, Toshkent irrigatsiya va qishloq xo‘jaligini mexanizatsiyalash muhandislari instituti eng yuqori natijani qayd etib, Osiyo universitetlari orasida 103-o‘rinni egalladi. Institut reytingda 67,4 ball to‘plagan.

Bundan tashqari, Mirzo Ulug‘bek nomidagi O‘zbekiston Milliy universiteti 180-o‘ringa, Toshkent davlat iqtisodiyot universiteti esa 274-o‘ringa joylashdi. 500 talik ichida Toshkent davlat texnika universiteti (301-o‘rin) va Samarqand davlat universiteti (307-o‘rin) ham o‘z nomini kiritishga muvaffaq bo‘ldi.

Qolgan oliy ta’lim muassasalari, jumladan, axborot texnologiyalari universitetlari va Farg‘ona, Buxoro hamda Urganchdagi mintaqaviy universitetlar 550+ va 1300 oralig‘ida joylashgan. Ushbu reytingning mutlaq yetakchisi esa Singapur Milliy universiteti bo‘lib, u yana birinchi o‘rinni egalladi.

Kuchli o‘ntalikdan Gonkong, Xitoy va Janubiy Koreya universitetlari ham o‘rin oldi.