O‘zbekiston Prezidenti Shavkat Mirziyoyev 4-noyabr kuni AQSh Prezidenti Donald Trampning taklifiga binoan ishchi tashrif bilan Vashingtonga yetib keldi. Bu haqda Zamin.uz xabar berdi.
Tashrifning asosiy tadbirlari 5-6-noyabr kunlariga rejalashtirilgan. Ushbu tashrif doirasida ikki davlat rahbarlari o‘rtasida uchrashuv o‘tkazilishi va Prezident Mirziyoyevning Markaziy Osiyo davlatlari hamda AQSh rahbarlarini birlashtiruvchi «C5+1» sammitida ishtirok etishi kutilmoqda.
Tashrif davomida AQSh Kongressi, hukumati va biznes doiralari vakillari bilan ham uchrashuvlar o‘tkazilishi rejalashtirilgan. Muzokaralarda savdo-iqtisodiy hamkorlikni mustahkamlash, investitsiya loyihalarini amalga oshirish va qo‘shma tashabbuslarni rivojlantirish masalalari muhokama qilinadi.
Shuningdek, transport, logistika va zamonaviy texnologiyalar sohasida hamkorlikni yo‘lga qo‘yish imkoniyatlari ko‘rib chiqiladi. Tashrif yakunida ikki tomonlama hamkorlikka oid bir qator hujjatlar imzolanishi kutilmoqda.
«C5+1» diplomatik muloqoti formati dastlab 2015-yilda tashqi ishlar vazirlari darajasida ishga tushirilgan edi. Markaziy Osiyo davlatlari prezidentlari va AQSh rahbari ishtirokidagi birinchi yuqori darajadagi uchrashuv esa 2023-yil sentabr oyida bo‘lib o‘tgan.
