O‘zbekistonda harbiy oliy ta’lim muassasalarini tamomlagan bitiruvchilarga qo‘yiladigan talablar kuchaytirildi. Bu haqda Zamin.uz xabar berdi.
Prezident qaroriga muvofiq, «Harbiy xizmatni o‘tash tartibi to‘g‘risida»gi nizomga o‘zgartirishlar kiritildi. Ushbu o‘zgarishlarga ko‘ra, endilikda bitiruvchilar besh yillik xizmat majburiyatini bajarishi shart.
Agar bu majburiyat bajarilmasa, davlat tomonidan ularning ta’limi uchun sarflangan xarajatlarni qoplash talabi joriy etiladi. Yangi tartibga binoan, harbiy oliy ta’lim dargohini tamomlagan shaxslar ofitser lavozimida kamida besh yil xizmat qilishi lozim.
Aks holda, davlat tomonidan ta’lim jarayonida sarflangan barcha mablag‘larni qaytarishi kerak bo‘ladi. Ushbu qoida faqat harbiy xizmatni o‘tovchi shaxslarga emas, balki boshqa vazirlik va idoralarga fuqarolik xodimi sifatida ishga yuborilgan bitiruvchilarga ham tatbiq etiladi.
Ular uchun ham besh yillik xizmat talabi qo‘yilgan, bu shart bajarilmasa, o‘qitishga sarflangan mablag‘lar davlatga qaytariladi. Harbiy oliy ta’lim muassasalarida kursantlarni tayyorlash uchun katta miqdorda mablag‘ sarflanadi.
Bu mablag‘lar faqat ta’lim, oziq-ovqat va kiyim-kechak bilan cheklanmaydi. Shuningdek, murakkab harbiy texnikalar, o‘q-dorilar va boshqa amaliy mashg‘ulotlarga sarflanadigan xarajatlar ham ushbu ta’lim jarayonining bir qismidir.
Shu sababli, harbiy ta’lim yo‘nalishi davlat uchun eng qimmat oliy ta’lim yo‘nalishlaridan biri hisoblanadi.
