Ahangaronda 10 milliard dollarlik «aqlli shahar» quriladi
Toshkent viloyatining Ahangaron tumanida umumiy qiymati 10 milliard dollarga teng bo‘lgan «Central Asia Smart City» loyihasini amalga oshirish rejalashtirilmoqda. Bu haqda Zamin.uz xabar berdi.
Bu loyiha mintaqadagi eng yirik iqtisodiy tashabbuslardan biri hisoblanadi va «Tashkent Medical Smart City» loyihasidan ikki baravar kattaroqdir. Mazkur loyiha Toshkent viloyati hokimiyati tomonidan tasdiqlangan bo‘lib, uni «Going Investment» qo‘shma korxonasi amalga oshiradi.
Ushbu korxonada Fransiya, Yaponiya, Turkiya va O‘zbekiston investorlarining ishtiroki mavjud. Qurilish uchun 6 400 gektar yer ajratilgan, dastlabki bosqichda esa 500 gektar hududda asosiy infratuzilma obyektlari quriladi.
Loyiha doirasida 200 ming aholiga mo‘ljallangan «aqlli yashil shahar» tashkil etilishi ko‘zda tutilgan. Birinchi bosqichda Markaziy Osiyo moliya markazi, savdo-logistika majmuasi, shuningdek, turizm va transport yo‘nalishlarida xalqaro markazlar barpo etiladi.
Shuningdek, loyihada 75 ming o‘rinli Al-Xorazmiy nomidagi xalqaro bilim va texnologiyalar markazini tashkil etish rejalashtirilgan. Loyihaning asosiy maqsadi ekologik barqaror va texnologik rivojlangan shahar muhitini yaratish hisoblanadi.
Yangi shaharni Toshkent va boshqa hududlar bilan bog‘lash uchun tezkor tramvay liniyasi qurilishi ham loyihaning muhim qismi sanaladi. Ushbu tramvay Toshkent, Nurafshon, Central Asia Smart City, Olmaliq va Ahangaron yo‘nalishida harakatlanadi.
Loyiha davlat-xususiy sheriklik asosida amalga oshiriladi. O‘zbekistonda «aqlli shaharlar» konsepsiyasi jadal rivojlanmoqda.
Masalan, Samarqand va Buxoro shaharlarida ham shunga o‘xshash kichikroq loyihalar amalga oshirilmoqda. Ushbu tashabbuslar raqamli texnologiyalarni shahar infratuzilmasiga integratsiya qilish orqali turistlar uchun jozibadorlikni oshirish va aholining turmush darajasini yaxshilashni maqsad qilgan.
