Xo‘jaylida yoshlar markazi va IT-universitet ochiladi

Qoraqalpog‘istonning Xo‘jayli tumanida Yoshlar ijtimoiy-iqtisodiy markazi tashkil etilishi rejalashtirilmoqda. Bu haqda Zamin.uz xabar berdi.

Bu haqda O‘zbekiston Prezidenti Shavkat Mirziyoyev qaroriga asoslanib, Adliya vazirligi ma’lum qildi. Mazkur markaz yoshlar uchun keng imkoniyatlar yaratishga qaratilgan bo‘lib, hududda zamonaviy IT-universitet ochilishi, texnoparklar va innovatsion qo‘llab-quvvatlash guruhlarini ishga tushirish rejalashtirilgan.

Shuningdek, yoshlarga ish o‘rinlari yaratish maqsadida turli ishlab chiqarish korxonalari tashkil etilishi belgilangan. Ushbu markaz faoliyatini samarali tashkil etish uchun Respublika Vazirlar Mahkamasi huzurida davlat muassasasi shaklida markaz direksiyasi tuziladi.

Bundan tashqari, ijtimoiy soha ob’ektlari investorlar tomonidan davlat organlariga beg‘araz ravishda topshirilishi ham ko‘zda tutilgan. Bu tashabbus yoshlarga zamonaviy bilim va ko‘nikmalarni egallashda yordam berib, ularning bandligini ta’minlashga xizmat qiladi.

Shu bilan birga, innovatsion texnologiyalarni rivojlantirish va iqtisodiyotni mustahkamlash uchun yangi imkoniyatlar eshigi ochiladi. Manba: One.uz