Endilikda O‘zbekistonda davlat byudjeti hisobidan tibbiy yordamni nafaqat davlat, balki xususiy tibbiyot muassasalarida ham olish mumkin. Bu haqda Zamin.uz xabar berdi.
Ushbu tartib Vazirlar Mahkamasi tomonidan tasdiqlangan qarorga asosan joriy etildi. Mazkur qarorga ko‘ra, tuman va shahar darajasidagi muassasalarda barcha fuqarolarga bepul tibbiy yordam ko‘rsatiladi.
Respublika darajasidagi muassasalarda esa bu yordam faqat imtiyozli toifaga kiruvchi bemorlar uchun mo‘ljallangan. Byudjet hisobidan davolanishni boshlash uchun avvalo o‘z poliklinikangizga murojaat qilishingiz kerak.
Poliklinikadagi oilaviy shifokor dastlabki tekshiruvni amalga oshiradi. Agar zarurat bo‘lsa, u bemorni tor mutaxassisga yo‘naltiradi.
Tor mutaxassis bemorni bir ish kuni ichida qabul qilishi lozim. Agar statsionar davolanish talab etilsa, oilaviy shifokor elektron tizim orqali tegishli tibbiyot muassasasiga yo‘llanma rasmiylashtiradi.
Tuman yoki shahar darajasidagi kasalxonalarga yo‘llanma bevosita shifokor tomonidan beriladi, respublika darajasidagi muassasalar uchun esa yo‘llanma maxsus tibbiy komissiya tomonidan ko‘rib chiqiladi. Komissiya bu masalani ikki ish kuni ichida hal qilishi shart.
Mazkur tartib bemorlarga tibbiy yordamni tezkor va samarali olish imkonini beradi.
