Energetika tizimiga 99 milliard so‘mlik zarar yetkazildi

O‘zbekiston Respublikasi Energetika nazorati inspeksiyasi (Energoinspeksiya) matbuot xizmati bergan ma’lumotga ko‘ra, mamlakatda energetika resurslaridan noqonuniy foydalanish holatlari aniqlanmoqda. Bu haqda Zamin.uz xabar berdi.

Ushbu holatlarni aniqlash va oldini olish maqsadida Energoinspeksiya xodimlari huquq-tartibot organlari va boshqa tegishli idoralar vakillari bilan birgalikda nazorat tadbirlarini amalga oshirishmoqda. Joriy yilning oktabr oyida o‘tkazilgan nazorat ishlari davomida mamlakat energetika tizimiga 99 milliard so‘m miqdorida zarar yetkazilgani qayd etildi.

Shu davr mobaynida iste’molchilar tomonidan energetika resurslaridan noqonuniy foydalanish bilan bog‘liq 192 ta holat aniqlangan. Xususan, 22,3 million kilovatt-soat elektr energiyasi noqonuniy ravishda iste’mol qilinib, 63,9 milliard so‘mlik zarar yetkazilgan.

Shuningdek, 11,4 million kub metr tabiiy gaz noqonuniy foydalanish natijasida 35 milliard so‘mlik talafot keltirilgan. Energetika resurslaridan foydalanish qoidalarini buzish bilan bog‘liq jami 479 ta ma’muriy ish qo‘zg‘atilgan.

Aniqlangan barcha holatlar bo‘yicha hujjatlar tegishli huquqni muhofaza qilish organlariga taqdim etilgan. Endilikda ushbu organlar tomonidan qo‘shimcha tergov ishlari olib borilib, energetika resurslaridan noqonuniy foydalangan shaxslarning xatti-harakatlariga huquqiy baho beriladi.

Ma’lumot manbasi: zamin.uz.