Rulda charchoq: 237 hodisa, 139 o‘lim qayd etildi
Yo‘llarda haydovchilarning charchagan yoki uyquchan holda transport boshqarishi jiddiy xavf tug‘dirmoqda. Bu haqda Zamin.uz xabar berdi.
Bu haqda Yo‘l harakati xavfsizligi xizmati xabar berdi. 2025 yil boshidan buyon haydovchilarning rulda uxlab qolishi sabab 237 ta yo‘l-transport hodisasi qayd etilgan.
Ushbu hodisalarda 139 kishi halok bo‘lgan, 195 nafar fuqaro esa turli darajadagi tan jarohatlari olgan. Mutaxassislarning ta’kidlashicha, charchoq holatida haydash mast holda boshqarish kabi xavfli hisoblanadi.
Ayniqsa, qish faslida mashina ichidagi issiqlik haydovchini tezroq uyquga tortadi. Natijada diqqat susayadi va reaksiya tezligi pasayadi.
Eng xavfli holatlardan biri bu mikrouyqudir. Bu holat bir necha soniya davom etadi va haydovchi buni sezmay qoladi.
Shu vaqt ichida avtomobil boshqaruvsiz holda o‘nlab metr harakatlanib, yo‘l-transport hodisasiga sabab bo‘lishi mumkin. Mutaxassislar haydovchilar orasida keng tarqalgan “uyg‘otuvchi usullar” — baland musiqa eshitish, oynani ochish yoki saqich chaynash kabi choralar faqat vaqtinchalik ta’sir ko‘rsatishini, ammo charchoqni bartaraf eta olmasligini ta’kidlamoqda.
Huquq-tartibot idoralari haydovchilarga charchoq sezilganda mashinani to‘xtatib, kamida 20–30 daqiqa dam olishni yoki imkon bo‘lsa qisqa muddat uxlab olishni tavsiya etmoqda. Qahva yoki kofeinli ichimliklar hushyorlikni vaqtincha oshirishi mumkin, lekin ular uyquni to‘liq almashtira olmaydi.
