Toshkent shahar hokimiyati tomonidan sobiq ToshTurma (1-son tergov izolyatori) hududi bo‘yicha Oliy Majlis Senatining so‘roviga javob berildi. Bu haqda Zamin.uz xabar berdi.
Ilgariroq Senat ushbu hududdagi obodonlashtirish ishlari uzoq cho‘zilib ketgani va noto‘g‘ri foydalanish holatlari mahalliy aholida savollar uyg‘otayotganini ta’kidlagan edi. Hokimiyat ma’lumotiga ko‘ra, 2020 yil oktyabr oyida shaharning sobiq hokimi qarori bilan Yunusobod tumanidagi sobiq tergov izolyatori o‘rnida joylashgan 2,9 gektar yer maydoni Ogneupor kompaniyasiga berilgan.
Bu yer kompaniyaning Chilonzor tumanidagi Chinoobod ko‘chasidagi buzilgan obyekti o‘rniga kompensatsiya sifatida ajratilgan. Keyinchalik Yunusobod tumani kengashi mazkur hududda 76 kvadrat metr maydonga ega ma’muriy bino qurilishini tasdiqlagan.
Biroq, bu yer konservatsiya hududiga kiritilgach, yangi bino qurilishi taqiqlangan. Hokimiyat ta’kidlashicha, qarorda kompaniyaning qanday bino qurishi kerakligi haqida aniq ko‘rsatma berilmagan.
Dastlab Ogneupor hududda ishlab chiqarish korxonasi qurishni rejalashtirgan, ammo yaqin atrofdagi turar-joylar sababli bu reja bekor qilingan. Shundan so‘ng kompaniya mehmonxona qurishni rejalashtirgan.
Ogneupor ikki marta yer maydonini xususiylashtirish uchun murojaat qilgan, lekin ikkala so‘rov ham rad etilgan. Sababi – Toshkent bosh rejasiga muvofiq, mazkur hudud konservatsiya zonasiga kiritilgani.
Kompaniya rahbariyati agar cheklovlar olib tashlansa, investorlarni jalb qilish va hududda mehmonxona hamda turar-joy binolari qurishga tayyor ekanini bildirgan. Manba: one.uz
