Tog‘li hududlarda qor ko‘chish xavfi e’lon qilindi
Toshkent viloyati aholisi uchun ogohlantirish e’lon qilindi. Bu haqda Zamin.uz xabar berdi.
Gidrometeorologiya xizmati mutaxassislarining ma’lumotiga ko‘ra, 5–7-noyabr kunlari havo haroratining keskin o‘zgarishi natijasida viloyatning tog‘li hududlarida, jumladan, Bo‘stonliq, Ohangaron va Parkent tumanlari hududlarida qor ko‘chish xavfi yuzaga kelgan. Ayniqsa, Chotqol tizmasida bu xavf yuqori darajada ekani ta’kidlanmoqda.
Fuqarolar, dam olish maskanlariga tashrif buyuruvchilar hamda tog‘li hududlarda harakatlanuvchi haydovchilar ehtiyotkor bo‘lishlari zarur. Xavfli hududlarga yaqinlashmaslik va tog‘ yo‘llarida harakatlanishda alohida ehtiyot choralari ko‘rish tavsiya etiladi.
Mutaxassislar qor ko‘chish xavfi ertalab va kechki soatlarda yanada kuchayishini, bunga haroratning tez o‘zgarishi sabab bo‘lishini ma’lum qilishdi. 4-noyabrdan boshlab O‘zbekiston bo‘ylab havo keskin sovib, tog‘li hududlarda qor yog‘ishi va shamol kuchayishi kuzatilgan edi.
Gidrometeorologiya xizmati ob-havoning beqarorligi bir necha kun davom etishi mumkinligini e’lon qildi. Shu sababli fuqarolarga rasmiy ob-havo ma’lumotlarini muntazam kuzatib borish tavsiya etilmoqda.
