Farg‘onada 350 mln dollarlik sanoat zonasi quriladi
Farg‘ona viloyatida qiymati 350 million dollar bo‘lgan yangi sanoat zonasini qurish rejalashtirilmoqda. Bu haqda Zamin.uz xabar berdi.
Ushbu loyiha Turkiyaning Heyal Holding kompaniyasi tomonidan amalga oshiriladi. Bu borada viloyat hokimiyati turk investorlari bilan muzokaralar o‘tkazdi.
Yangi sanoat zonasida jami 15 ta obyekt, jumladan, do‘konlar, ko‘rgazma zallari, mehmonxonalar va boshqa zarur inshootlar qurilishi mo‘ljallangan. Loyihaning asosiy qismi ishlab chiqarish binolaridan iborat bo‘lib, ular zamonaviy texnologiyalar, jumladan, “aqlli tizimlar” asosida barpo etiladi.
Elektr energiyasidan samarali foydalanish uchun quyosh panellari o‘rnatilishi, ekologik tozalikni ta’minlash maqsadida esa chiqindilarni qayta ishlash tizimi joriy etilishi ko‘zda tutilgan. Viloyat hokimligi ma’lumotiga ko‘ra, yaqin kunlarda loyiha materiallarini tayyorlash va qurilish ishlarini boshlash uchun mutaxassislar Farg‘onaga yetib keladi.
Muzokaralar natijasida Farg‘ona viloyati hokimligi va Heyal Holding kompaniyasi o‘rtasida hamkorlik bo‘yicha memorandum imzolandi. Manba: Zamin.uz.
