Toshkentda Pampers ishlab chiqaruvchi yangi zavod quriladi
Procter & Gamble kompaniyasining O‘zbekistonda faoliyatini kengaytirish doirasida Toshkent shahrida yangi zavod qurilishi rejalashtirilmoqda. Bu haqda Zamin.uz xabar berdi.
Kompaniyaning Turkiyadagi bo‘limi PRIMA tomonidan Toshkent Pharma Park klasterida gigiyenik mahsulotlar ishlab chiqaruvchi korxona uchun 20 million AQSh dollari miqdorida investitsiya kiritilmoqda. Bu haqda 1-noyabr kuni kompaniya vakillari va Farmatsevtika sohasini rivojlantirish agentligi direktori Abdulla Azizov o‘rtasida o‘tkazilgan uchrashuvda kelishuvga erishildi.
Yangi zavodda Pampers bolalar tagliklari, nam salfetkalar hamda boshqa shaxsiy gigiyena mahsulotlari ishlab chiqarilishi ko‘zda tutilgan. Ushbu loyiha 350 dan ortiq yangi ish o‘rni yaratishni ta'minlaydi.
Investitsiya qarori mamlakatda amalga oshirilayotgan iqtisodiy islohotlar, jumladan, mahsulotlarni sertifikatlashtirish tartibini soddalashtirish va davlat ro‘yxatidan o‘tkazish rejimini bekor qilish kabi o‘zgarishlar natijasida qabul qilingan. Shuningdek, mahsulotlarga muvofiqlik deklaratsiyasini joriy etish amaliyoti yo‘lga qo‘yilib, bu investorlar uchun qulay biznes muhitini shakllantirishga xizmat qilmoqda.
Ushbu loyiha 2025-yil oxirigacha umumiy qiymati 166 million dollar bo‘lgan 32 ta investitsiya tashabbusining bir qismi sanaladi. Umuman olganda, mazkur dastur doirasida 1500 ta yangi ish o‘rni yaratish, ishlab chiqarish va eksport hajmini oshirish hamda ayrim mahsulotlar narxini pasaytirish maqsad qilingan.
Markaziy Osiyo mintaqasida bolalar tagliklari bozori eng tez rivojlanayotgan iste’mol tovarlari segmentlaridan biri hisoblanadi. Bu holat hududdagi yuqori tug‘ilish ko‘rsatkichlari bilan izohlanadi.
