O‘zbekiston va AQSH Eksimbanki hamkorligi kuchayadi
Prezident Shavkat Mirziyoyev 6-noyabr kuni Vashingtonda AQSH Eksport-import banki (Eksimbank) rahbari Jon Yovanovich bilan uchrashuv o‘tkazdi. Bu haqda Zamin.uz xabar berdi.
Uchrashuvning asosiy maqsadi O‘zbekiston va AQSH o‘rtasidagi iqtisodiy hamkorlikni yangi bosqichga olib chiqish edi. Bu haqda Prezident matbuot xizmati xabar berdi.
Eksimbank AQSH hukumatining rasmiy eksport-kredit agentligi hisoblanadi. Bankning bosh vazifasi Amerika kompaniyalarining xalqaro iqtisodiy faoliyatini sug‘urta, kafolat va kredit vositalari orqali qo‘llab-quvvatlashdan iborat.
Suhbat davomida O‘zbekiston va Eksimbank o‘rtasida energetika, muhim minerallar, transport, qishloq xo‘jaligi va axborot texnologiyalari sohalarida yirik hamkorlik loyihalarini amalga oshirish imkoniyatlari muhokama qilindi. Ayniqsa, AQSHning nufuzli moliyaviy institutining O‘zbekiston aviaparkini modernizatsiya qilish, yangi avlod Boeing samolyotlarini sotib olish va yetkazib berishda ishtirok etishiga alohida e’tibor qaratildi.
Prezident bu sohadagi hamkorlikni mamlakat transport infratuzilmasini rivojlantirishda muhim omil sifatida qayd etdi. Uchrashuvda ikki tomon uzoq muddatli moliyaviy sheriklikni rivojlantirishga qiziqish bildirdi.
Kelgusida strategik ahamiyatga ega loyihalarni moliyalashtirish uchun yangi mexanizmlar ishlab chiqishga kelishildi. Shuningdek, Eksimbankning qishloq xo‘jaligi va sanoat sohalaridagi loyihalarni moliyalashtirishda faol qatnashishi, mahalliy ishlab chiqaruvchilar uchun qulay sharoitlar yaratish masalalari ham muhokama qilindi.
Uchrashuv yakunida O‘zbekiston Investitsiyalar, sanoat va savdo vazirligi hamda AQSH Eksimbanki o‘rtasida qo‘shma loyihalarni moliyalashtirish to‘g‘risidagi bitim imzolandi. Ushbu kelishuv ikki davlat o‘rtasidagi iqtisodiy hamkorlikni yangi bosqichga olib chiqishi va Amerika biznesining O‘zbekiston bozoriga kirib kelishi uchun keng imkoniyatlar yaratishi kutilmoqda.
Tahlilchilarning fikricha, mazkur uchrashuv O‘zbekiston va AQSH o‘rtasidagi moliyaviy munosabatlarni mustahkamlash bilan birga, O‘zbekistonning xorijiy investitsiyalarga ochiqligini yana bir bor tasdiqlaydi. Prezidentning Vashingtondagi ish dasturi doirasida texnologiya, energetika va logistika sohalarida yirik korporatsiyalar bilan boshqa muhim uchrashuvlar ham rejalashtirilgan.
