Xivaning kechki manzaralari dunyoni maftun etdi
National Geographic Travel’ning Instagram’dagi rasmiy sahifasida Xiva shahrining kechki manzaralarini tasvirlagan suratlar e’lon qilindi. Bu haqda Zamin.uz xabar berdi.
Ushbu suratlar dunyo bo‘ylab foydalanuvchilar orasida katta qiziqish uyg‘otdi va keng e’tirofga sazovor bo‘ldi. Mazkur postda Xivaning qadimiy arxitekturasi va tungi yorug‘likda yanada go‘zal ko‘rinishi o‘z aksini topgan.
Bu manzaralar shahar nega O‘zbekistonning eng chiroyli va fotosuratga mos joylaridan biri hisoblanishini yana bir bor tasdiqlaydi. Shuningdek, Xiva YuNESKOning Jahon merosi ro‘yxatiga kiritilgani ham alohida ta’kidlangan.
National Geographic kabi nufuzli xalqaro ommaviy axborot vositalarida bunday kontentning chop etilishi O‘zbekistonning turistik salohiyatini targ‘ib qilishda va mamlakatning xalqaro imijini yanada mustahkamlashda muhim o‘rin tutadi. Xiva shahri nafaqat o‘zining boy tarixi, balki betakror me’moriy obidalari bilan ham dunyo sayyohlarini jalb qilmoqda.
