Mirziyoyev «C5+1» sammitida muhim tashabbuslar berdi
O‘zbekiston Prezidenti Shavkat Mirziyoyev Markaziy Osiyo davlatlari va AQSh yetakchilarining «C5+1» formatidagi sammitida ishtirok etdi. Bu haqda Zamin.uz xabar berdi.
Ushbu uchrashuv AQShning Oq uyida bo‘lib o‘tdi. Unda Qozog‘iston, Qirg‘iziston, Tojikiston va Turkmaniston rahbarlari ham qatnashdi.
Prezident Mirziyoyev mintaqaviy hamkorlikni rivojlantirishga qaratilgan bir qator muhim tashabbuslarni ilgari surdi. U «C5+1» formati uchun Sekretariat tashkil etish, Koordinatsion investitsiya kengashini tuzish hamda mintaqaviy investitsiya fondini ishga tushirish takliflarini berdi.
Shuningdek, Markaziy Osiyo va AQShning yirik transport-kommunikatsiya va energetika loyihalarida hamkorlik qilish zarurligini ta’kidladi. U Janubiy Kavkaz va Yevropa davlatlari bilan aloqalarni mustahkamlashni ham muhim vazifa sifatida ko‘rsatdi.
Bundan tashqari, Prezident kritik minerallar bo‘yicha maxsus qo‘mita tashkil etish tashabbusini ilgari surdi. Mirziyoyev qishloq xo‘jaligida AQSh tajribasidan foydalanish orqali agrotexnologik innovatsiyalarni joriy etishni taklif qildi.
Bu borada Mintaqaviy hamkorlik tashabbusini yo‘lga qo‘yish masalasi muhokama qilindi. Sammit yakunida Prezident Shavkat Mirziyoyev keyingi «C5+1» formatidagi uchrashuvni Samarqand shahrida o‘tkazishni taklif etdi.
Bu taklif mintaqaviy muloqotni davom ettirish va hamkorlikni yanada chuqurlashtirishga qaratilgan.
