Farg‘ona viloyati Favqulodda vaziyatlar boshqarmasi matbuot xizmatining xabariga ko‘ra, 2025-yil 6-noyabr kuni soat taxminan 21:10 da Farg‘ona shahridagi "Ma'rifat" mahalla fuqarolar yig‘ini hududida joylashgan bir xonadonda yong‘in sodir bo‘lgan. Bu haqda Zamin.uz xabar berdi.
Yong‘in uy ichki qismi va tom qismini qamrab olgan. Voqea joyiga Favqulodda vaziyatlar vazirligi xodimlari 21:13 da yetib kelib, darhol yong‘inni bartaraf etish ishlariga kirishgan.
Yong‘in 21:16 da lokalizatsiya qilinib, oradan 8 daqiqa o‘tib to‘liq o‘chirilgan. Hodisa natijasida hech kim jabrlanmagan.
Yong‘in oqibatida 100 kvadrat metr maydon saqlab qolingan. Hozirda yong‘inning kelib chiqish sababi va yetkazilgan moddiy zarar miqdori o‘rganilmoqda.
