Polkovnik Baxtiyor Mansurov 68 yoshida vafot etdi
O‘zbekiston Davlat xavfsizlik xizmati Chegara qo‘shinlari qo‘mondoni o‘rinbosari, polkovnik Baxtiyor Mo‘minovich Mansurov 2025-yil 5-noyabr kuni 68 yoshida vafot etdi. Bu haqda Zamin.uz xabar berdi.
Baxtiyor Mansurov 1957-yil 27-fevralda Jizzax shahrida tug‘ilgan. U umrining qariyb 40 yilini Vatan qurolli kuchlariga bag‘ishlab, Mudofaa vazirligi hamda Chegara qo‘shinlarida turli rahbarlik lavozimlarida faoliyat yuritgan.
Uning xizmat faoliyati davomida sadoqati, halolligi va fidoyiligi ko‘pchilik tomonidan e’tirof etilgan. Polkovnik Mansurov Chegara qo‘shinlarining moddiy-texnik bazasini mustahkamlash, yosh kadrlarni tayyorlash va tizimni zamonaviylashtirish borasida muhim ishlarni amalga oshirgan.
U mamlakat mudofaa tizimidagi xizmatlari uchun 2024-yilda “O‘zbekiston Respublikasida xizmat ko‘rsatgan quruvchi” faxriy unvoni bilan taqdirlangan edi. Harbiy hamkasblari va shogirdlariga ko‘ra, Baxtiyor Mansurov Vatanga sadoqatli, qat’iyatli va el farovonligi yo‘lida fidokor inson sifatida hamisha esda qoladi.
