«Paxtakor» bekatidagi tiqilinch sabablari ma’lum qilindi
Toshkent metropoliteni matbuot xizmati «Paxtakor» metro bekatida kuzatilgan yo‘lovchilar tiqilishi bo‘yicha izoh berdi. Bu haqda Zamin.uz xabar berdi.
Ularning ma’lum qilishicha, ushbu holat ijtimoiy tarmoqlarda keng muhokama qilingan. O‘rganishlarga ko‘ra, voqea 18:20 va 18:50 oralig‘ida yuz bergan.
Bu vaqtda yo‘lovchilar oqimi keskin ko‘paygan va ikki tomondan kelgan poyezdlar qisqa fursatda bekatga yetib kelgan. Shu sababli ko‘plab yo‘lovchilar boshqa yo‘nalishlarga o‘tishga harakat qilgan.
Mazkur vaziyatni bartaraf etish maqsadida mutasaddilar barcha yo‘nalishlarda qo‘shimcha zaxira poyezdlarni harakatga tushirishgan. Natijada, tiqilinch odatda 3-4 daqiqada hal qilinadi.
Shuningdek, oxirgi paytlarda Toshkent metrosiga bo‘lgan talab sezilarli darajada oshgani qayd etildi. Ko‘plab yo‘lovchilar avtobus va marshrutkalar o‘rniga metrodan foydalanishni afzal ko‘rmoqda.
Bu esa metro transportining qulayligi va tezkorligini yana bir bor tasdiqlaydi.
