Quvada 350 mln dollarlik sanoat hududi quriladi
Farg‘ona viloyatining Quva tumanida 350 million dollarlik zamonaviy sanoat hududi tashkil etilishi rejalashtirilmoqda. Bu haqda Zamin.uz xabar berdi.
Ushbu loyiha Turkiyaning yirik kompaniyalaridan biri – "Heyal Holding" tomonidan amalga oshiriladi. Bu haqda Farg‘ona viloyati hokimi Xayrullo Bozorov va "Heyal Holding" asoschisi Vahdettin Heyal o‘rtasidagi kelishuv davomida ma’lum qilindi.
Loyihaning asosiy maqsadi mintaqa iqtisodiyotini rivojlantirish va zamonaviy ishlab chiqarish imkoniyatlarini kengaytirishdir. Yangi sanoat hududida 15 dan ortiq ko‘p funksiyali obyektlar qurilishi rejalashtirilgan.
Ular orasida ishlab chiqarish sexlari, savdo markazlari, mehmonxonalar, konferensiya zallari va mahsulotlar ko‘rgazma xonalari mavjud. Loyihada zamonaviy texnologiyalar va ekologik me’yorlarga alohida e’tibor qaratiladi.
Ishlab chiqarish jarayonlari "aqlli tizimlar" asosida tashkil qilinib, energiya samaradorligini oshirish uchun quyosh panellari o‘rnatiladi. Shu bilan birga, chiqindilarni qayta ishlash tizimlari joriy etiladi.
Loyihada mahalliy kadrlarni tayyorlash va ularning malakasini oshirish uchun kasb-hunar o‘quv markazi tashkil etilishi ham ko‘zda tutilgan. Bu hududda quriladigan yangi korxonalar mintaqa aholisini ish bilan ta’minlashda muhim rol o‘ynaydi.
Farg‘ona viloyati delegatsiyasining Turkiyaga tashrifi davomida boshqa masalalar ham muhokama qilindi. Xususan, hokim Xayrullo Bozorov Turkiyaning 30 ga yaqin kompaniyalari vakillari bilan uchrashib, avtomobilsozlik, qurilish, zargarlik, energetika va axborot texnologiyalari sohalarida investitsiya imkoniyatlarini muhokama qildi.
Masalan, "Aktiv Group" Farg‘onada mehmonxona qurish va tarixiy binolarni qayta tiklashni rejalashtirmoqda, "Aydin Gold" esa zargarlik sohasida yangi loyihalarni amalga oshirishga qiziqish bildirdi. Shuningdek, "SMTR Group" avtomobillar uchun yonilg‘i baklarini ishlab chiqarishni mahalliylashtirishni o‘rgandi, "Seyhan Ambalaj Makina" esa Quva logistika markazida qadoqlash uskunalari ishlab chiqarishni yo‘lga qo‘yishni rejalashtirdi.
Bundan tashqari, "Cabani Shoes" kompaniyasi Farg‘onada o‘zining uchinchi rasmiy butikini ochmoqchi. Oktabr oyida Xayrullo Bozorov va Vahdettin Heyal ikki marta uchrashib, sanoat hududida amalga oshiriladigan 25 ta yirik loyiha bo‘yicha muhokamalar o‘tkazdi.
Ulardan oltitasi bo‘yicha aniq takliflar ishlab chiqilgan. Yaqin kunlarda "Heyal Holding" mutaxassislari Farg‘onaga tashrif buyurib, loyiha hujjatlarini ishlab chiqish va qurilish tayyorgarliklarini boshlashi kutilmoqda.
Yakunda Farg‘ona viloyati hokimiyati va "Heyal Holding" o‘rtasida xalqaro hamkorlik bo‘yicha memorandum imzolandi.
