AQSh Davlat departamenti “Diversity Visa” (Green Card) dasturiga oid bir qator o‘zgarishlar joriy etilganini e’lon qildi. Bu haqda Zamin.uz xabar berdi.
Bu haqda idoraning rasmiy veb-saytida ma’lumot berilgan. Unga ko‘ra, 2027-yil uchun mo‘ljallangan DV–2027 lotereyasi bo‘yicha ariza topshirish muddati va ro‘yxatdan o‘tish jarayonida ayrim yangiliklar kiritilgan.
Lotereyada ishtirok etishning aniq sanalari va natijalarning “Entry Status Check” tizimi orqali e’lon qilinadigan kuni yaqin kunlarda ma’lum qilinishi kutilmoqda. Shu bilan birga, bu o‘zgarishlar vizaga ariza topshirish muddatiga ta’sir ko‘rsatmaydi.
G‘oliblar uchun hujjatlarni topshirish jarayoni avvalgidek, 2026-yilning 1-oktyabridan 2027-yilning 30-sentyabrigacha davom etadi. Avvalgi yillarda Green Card lotereyasi uchun arizalar har yili oktyabr oyi boshida qabul qilinib, noyabrning birinchi haftasida yakunlanardi.
Ammo joriy yilda bu jarayon hali boshlanmagan. Shuningdek, sentyabr oyida AQSh Davlat departamenti DV lotereyasida ishtirok etish uchun elektron ro‘yxatdan o‘tishda yangi $1 to‘lov joriy qilinganini ma’lum qilgan edi.
Ushbu to‘lov tizimni avtomatlashtirish va sun’iy arizalar sonini kamaytirish maqsadida kiritilgan. Mutaxassislarning fikricha, bu o‘zgarishlar dastur shaffofligini oshirish va texnik xatolarning oldini olishga xizmat qiladi.
Manba: AQSh Davlat departamenti rasmiy sayti.
