Nukus–Urganch poyezd chiptalari narxi ikki baravarga oshdi
22-noyabrdan boshlab “O‘zbekiston temir yo‘llari” aksiyadorlik jamiyati Nukus–Urganch–Nukus yo‘nalishidagi poyezd chiptalari uchun yangi tariflarni joriy etadi. Bu haqda Zamin.uz xabar berdi.
Bu haqda kompaniya matbuot xizmati xabar berdi. Yangi narxlarga ko‘ra, kattalar uchun chipta narxi 40 ming so‘mni, bolalar uchun esa 21,5 ming so‘mni tashkil etadi.
Avvalgi tarif bo‘yicha kattalar 20 ming so‘m, bolalar esa 11,5 ming so‘m to‘lagan. Shunday qilib, narxlar deyarli ikki baravarga oshmoqda.
Mazkur o‘zgarishlar xizmat sifatini oshirish va qulayliklarni yaxshilash, shuningdek, poyezd harakati samaradorligini ta’minlash maqsadida amalga oshirilayotgani ta’kidlanmoqda. Eslatib o‘tamiz, “Nukus–Urganch–Nukus” yo‘nalishidagi poyezd shu yilning 27-sentyabridan boshlab qatnovni yo‘lga qo‘ygan.
Poyezd har kuni ertalab soat 05:30 da Nukusdan jo‘nab, 08:50 da Urganchga yetib boradi. Qaytish reysi esa Urganchdan soat 15:30 da yo‘lga chiqib, 18:50 da Nukusga yetadi.
Yo‘lovchilar fikriga ko‘ra, mazkur yo‘nalish ichki turizm uchun muhim ahamiyat kasb etmoqda. Ushbu qatnov orqali har kuni yuzlab odamlar ikki viloyat orasida safar qiladi.
Bu esa hududlararo aloqalarni mustahkamlashga xizmat qilmoqda.
