AQShning sobiq prezidenti Donald Tramp Truth Social ijtimoiy tarmog‘ida Vashington shahrida o‘tkazilgan «C5+1» sammiti haqida o‘z fikrlarini bildirdi. Bu haqda Zamin.uz xabar berdi.
U ushbu sammitni O‘zbekiston va Markaziy Osiyo davlatlari bilan yangi va mustahkam hamkorlikning boshlanishi sifatida baholadi. Trampning so‘zlariga ko‘ra, Markaziy Osiyo strategik jihatdan muhim mintaqa bo‘lib, u Yevropa, Osiyo va Yaqin Sharq chorrahasida joylashgan.
Bu hudud boy tabiiy resurslar, jumladan, mineral zaxiralar, uglevodorodlar va yuqori salohiyatli inson resurslariga ega. Donald Tramp AQSh prezidenti sifatida ushbu jarayonlarda faol ishtirok etish niyatini bildirdi.
Sammit natijasida tomonlar milliardlab dollarlik shartnomalar imzolaganini ta’kidladi. Unga ko‘ra, kelishuvlar AQShda aviatsiya va mineral resurslarni qazib olish kabi sohalarda yangi ish o‘rinlarini yaratishga xizmat qiladi.
Shuningdek, O‘zbekistonning 2028-yilgacha AQSh iqtisodiyotiga 35 milliard dollar, keyingi o‘n yil ichida esa 100 milliard dollardan ortiq mablag‘ yo‘naltirishi kutilmoqda. O‘zbekiston prezidenti Shavkat Mirziyoyevning AQShga tashrifi davomida bir qator muhim hujjatlar imzolandi.
Ular orasida noyob yer elementlarini o‘zlashtirishga doir hamkorlik bitimlari, Boeing kompaniyasidan 22 ta samolyot sotib olish, shuningdek, soya mahsulotlarini xarid qilish bo‘yicha kelishuvlar bor. Mirziyoyev sammit davomida Ukraina urushini to‘xtatishga faqat joriy AQSh prezidenti qodir ekanini ta’kidladi.
O‘zbekiston rahbari Trampga Markaziy Osiyoga qaratilgan e’tibori uchun minnatdorlik bildirib, uni O‘zbekistonda «tinchlik prezidenti» deb atashlarini qayd etdi.
