O‘zbekiston kiberxavfsizlikda Palo Alto bilan hamkorlik qiladi
O‘zbekiston Respublikasi kiberxavfsizlik sohasida dunyodagi yetakchi kompaniyalardan biri bo‘lgan AQShning Palo Alto Networks kompaniyasi bilan uzoq muddatli strategik hamkorlik bo‘yicha kelishuv imzoladi. Bu haqda Zamin.uz xabar berdi.
Ushbu hamkorlik mamlakatning raqamli infratuzilmasini kuchaytirishga qaratilgan bo‘lib, sun’iy intellekt asosidagi ilg‘or texnologiyalarni joriy qilish orqali kiberxavfsizlikni ta’minlashni maqsad qilgan. Mazkur kelishuv O‘zbekiston hukumat delegatsiyasining AQShga tashrifi chog‘ida amalga oshirildi.
Delegatsiya tarkibida Raqamli texnologiyalar vaziri Sherzod Shermatov va Investitsiyalar vaziri Laziz Qudratov ishtirok etdi. Safar davomida Palo Alto Networks kompaniyasining davlatlar bilan hamkorlik bo‘yicha vitse-prezidenti Deniel Kros bilan muzokaralar o‘tkazildi.
Uchrashuv davomida O‘zbekistonning raqamli xavfsizlik salohiyatini oshirishga qaratilgan aniq chora-tadbirlar muhokama qilindi. Hamkorlik doirasida davlat va xususiy sektorlarda ma’lumotlarni himoya qilish, raqamli barqarorlikni ta’minlash uchun zamonaviy tizimlarni joriy etish rejalashtirilmoqda.
Xususan, sun’iy intellekt yordamida ishlovchi tizimlar kiberxavflarni real vaqt rejimida aniqlash va bartaraf etishga qodir. Shuningdek, shifrlash texnologiyalaridan foydalanish ham ko‘zda tutilgan.
Kelishuv faqat texnologiyalar yetkazib berish bilan cheklanmay, keng qamrovli kiberxavfsizlik dasturlarini ishga tushirishni ham o‘z ichiga oladi. Bu dasturlar doirasida maslahatlashuvlar tashkil etilib, amerikalik va o‘zbekistonlik mutaxassislar o‘rtasida tajriba almashinuvi yo‘lga qo‘yiladi.
Shu bilan birga, raqamli xavfsizlik bo‘yicha mahalliy kadrlarni tayyorlash va ularning malakasini oshirishga katta e’tibor qaratiladi. Bu esa O‘zbekistonda yuqori malakali mutaxassislar bazasini yaratishga xizmat qiladi.
Muzokaralar davomida mahalliy startap loyihalarining texnik xavfsizligi va ularning xalqaro standartlarga mosligi masalalari ham muhokama qilindi. Ushbu kelishuv O‘zbekistonning yetakchi xalqaro IT kompaniyalarni jalb qilishga qaratilgan keng ko‘lamli strategiyasining bir qismi hisoblanadi.
Bundan tashqari, Raqamli texnologiyalar vaziri Sherzod Shermatov AQShning Wersirius logistika kompaniyasi va AMALT assotsiatsiyasi bilan uchrashuvlar o‘tkazib, O‘zbekistonda operatsion markazlar ochish va yangi dasturlarni amalga oshirish masalalarini muhokama qilgan. Manba: Zamin.uz
