O‘zbekistonda maktabgacha ta’lim muassasalari soni oshdi

2024-yil yakuni bo‘yicha O‘zbekistonda jami 38 058 ta maktabgacha ta’lim tashkiloti faoliyat olib borgan. Bu haqda Zamin.uz xabar berdi.

Ularning katta qismi, ya’ni 28 729 tasi oilaviy nodavlat maktabgacha ta’lim muassasalaridan iborat. Bu esa xususiy sektorning bolalarni maktabgacha ta’lim bilan qamrab olishda muhim o‘rin tutayotganini ko‘rsatadi.

So‘nggi bir yil ichida mamlakatda maktabgacha ta’lim tashkilotlari soni 2 085 taga oshgan. Bu o‘z navbatida bolalarni erta yoshdan sifatli ta’lim bilan ta’minlashga bo‘lgan ehtiyoj ortib borayotganidan dalolat beradi.

Hududlar bo‘yicha tahlil qiladigan bo‘lsak, Samarqand viloyati 4 507 ta maktabgacha ta’lim tashkiloti bilan yetakchilik qilmoqda. Shuningdek, Andijon, Qashqadaryo va Farg‘ona viloyatlari ham faol tashkilotlari soni bo‘yicha yuqori o‘rinlarda turibdi, ularning har birida bu ko‘rsatkich 4 mingga yaqin.

Eng kam maktabgacha ta’lim tashkilotlari esa Sirdaryo viloyati (1 145 ta) va Toshkent shahrida (1 047 ta) joylashgan. Umuman olganda, mamlakat bo‘ylab maktabgacha ta’lim tashkilotlari faoliyatini kengaytirish va ularning sifatini oshirish bo‘yicha izchil ishlar olib borilmoqda.

Manba: One.uz