Samarqand kartoshka yetishtirishda yetakchilik qilmoqda
Milliy statistika qo‘mitasining dastlabki ma’lumotlariga ko‘ra, joriy yilning yanvar-sentyabr oylarida respublikamizda barcha toifadagi xo‘jaliklar tomonidan jami 3,1 million tonna kartoshka yetishtirilgan. Bu haqda Zamin.uz xabar berdi.
Ushbu ko‘rsatkich o‘tgan yilga nisbatan barqaror o‘sishni ko‘rsatmoqda. Hududlar kesimida olib borilgan tahlillar Samarqand viloyatining kartoshka yetishtirish bo‘yicha yetakchi o‘rinni egallayotganini tasdiqladi.
Viloyatda 631 922 tonna kartoshka yetishtirilgan bo‘lib, bu mamlakat bo‘yicha umumiy hajmning qariyb beshdan bir qismini tashkil etadi. Ikkinchi o‘rinda Toshkent viloyati (320 053 tonna), uchinchi o‘rinda esa Farg‘ona viloyati (317 426 tonna) joylashgan.
Keyingi o‘rinlarda Surxondaryo (316 052 tonna) va Andijon (306 060 tonna) viloyatlari kelmoqda. Namangan viloyatida 298 992 tonna, Buxoro viloyatida esa 278 682 tonna kartoshka yetishtirilgan.
Qashqadaryoda bu ko‘rsatkich 168 317 tonnani tashkil etgan. Navoiy (83 552 tonna), Jizzax (68 103 tonna) va Qoraqalpog‘iston Respublikasi (66 102 tonna)da hosil hajmi nisbatan kamroq bo‘lsa-da, barqaror o‘sish kuzatilmoqda.
Sirdaryo viloyatida 60 131 tonna, Xorazmda esa 140 672 tonna kartoshka yetishtirilgan. Toshkent shahrida esa kartoshka yetishtirish hajmi 429 tonna atrofida bo‘lib, poytaxt ehtiyoji asosan boshqa hududlardan keltiriladigan mahsulotlar hisobiga qoplanmoqda.
Mutaxassislarning fikriga ko‘ra, joriy yilda ob-havo sharoiti va irrigatsiya tizimining yaxshilanishi kartoshka hosilining yuqori bo‘lishiga ijobiy ta’sir ko‘rsatgan. Shuningdek, agrotexnologiyalar va yangi urug‘lik navlaridan foydalanish hosildorlikni oshirishga yordam bergan.
Natijada, Samarqand viloyati yana bir bor kartoshka yetishtirish bo‘yicha mamlakat yetakchisi ekanligini isbotladi. Ma’lumot manbasi: One.uz.
