O‘zbekiston suv va salomatlik protokoliga qo‘shildi
O‘zbekiston Respublikasi Transchegaraviy suv oqimlari va xalqaro ko‘llarni muhofaza qilish hamda ulardan foydalanish bo‘yicha konvensiyaning suv va salomatlik masalalari bo‘yicha protokoliga rasmiy ravishda qo‘shildi. Bu haqda Zamin.uz xabar berdi.
Ushbu qaror Budapesht shahrida o‘tkazilgan protokol taraflari uchrashuvida e’lon qilindi. Bu qadam Markaziy Osiyo mintaqasida suv resurslari tanqis bo‘lgan va iqlim o‘zgarishlari ta’siri kuchayayotgan bir sharoitda O‘zbekiston uchun strategik ahamiyat kasb etadi.
Shu tariqa, O‘zbekiston protokolga qo‘shilgan 29-davlatga aylandi. 2005-yildan buyon amal qilayotgan ushbu protokol Yevropa iqtisodiy komissiyasi va Jahon sog‘liqni saqlash tashkiloti Yevropa byurosi hamkorligida boshqariladi.
Mazkur hujjat suv resurslarini boshqarish, ekologiya va jamoat salomatligini bir-biri bilan bog‘laydigan yagona huquqiy vosita hisoblanadi. Uning asosiy maqsadi barcha aholiga sifatli ichimlik suvi va sanitariya sharoitlarini ta’minlash orqali fuqarolar salomatligi va hayot sifatini yaxshilashdan iborat.
Sog‘liqni saqlash vazirligi Sanitariya-epidemiologik osoyishtalik va jamoat salomatligi qo‘mitasi vakili Olga Mirshinaning ta’kidlashicha, O‘zbekistonning geografik joylashuvi va qurg‘oqchil iqlimi mamlakatni suv tanqisligiga nisbatan o‘ta zaif qiladi. Uning so‘zlariga ko‘ra, ushbu protokol xavfsiz ichimlik suvi, sanitariya va gigiyena masalalarini rivojlantirishda muhim ahamiyatga ega.
Ayniqsa, qishloq joylarda suv taqchilligi bilan bog‘liq muammolarni hal qilish zarurati dolzarb masalalardan biridir. Xalqaro tashkilotlarning ma’lumotlariga ko‘ra, shaharlarda aholini ichimlik suvi bilan ta’minlash darajasi 89 foizni tashkil etsa, qishloqlarda bu ko‘rsatkich atigi 71 foizga teng.
Iqlim o‘zgarishlari bo‘yicha prognozlarga ko‘ra, 2050-yilga kelib Amudaryo havzasidagi suv resurslari 10-15 foizga, Sirdaryo havzasida esa 2-5 foizga qisqarishi mumkin. Bu holat qishloq xo‘jaligi sohasiga, shuningdek, aholining umumiy salomatligiga jiddiy xavf tug‘diradi.
Protokolni qabul qilish orqali O‘zbekiston suv ta’minoti va sanitariya sohasida milliy maqsadlarni belgilash, ilg‘or monitoring tizimini yaratish va BMTning barqaror rivojlanish maqsadlari, xususan, suv resurslari va sanitariyani barcha uchun mavjud qilishga qaratilgan 6-maqsadga erishishda muhim qadam tashladi. Bu sa’y-harakatlar mamlakatning barqaror rivojlanishi va aholi farovonligini oshirishga xizmat qiladi.
