Raqobatni rivojlantirish va iste'molchilar huquqlarini himoya qilish qo‘mitasi matbuot xizmati tomonidan biologik faol qo‘shimchalar (BAD) va boshqa mahsulotlarga oid murojaatlar bo‘yicha axborot e’lon qilindi. Bu haqda Zamin.uz xabar berdi.
Qo‘mita iste'molchilar huquqlarini himoya qilish va "Reklama to‘g‘risida"gi qonun talablariga rioya etilishini nazorat qiladi. Shu maqsadda oziq-ovqat mahsulotlari, dori vositalari va BADlar bo‘yicha muntazam ravishda nazorat xaridlari amalga oshiriladi.
So‘nggi yillarda olib borilgan nazorat xaridlari natijalari quyidagicha: 2023 yilda 397 ta xarid amalga oshirilgan bo‘lib, ulardan 24 tasi sifatsiz deb topilgan. 2024 yilda esa 560 ta xarid o‘tkazilib, 95 tasida qonunbuzarlik aniqlangan.
2025 yilda esa 618 ta xariddan 123 tasi belgilangan talablarga javob bermagan. Bugungi kunga qadar qo‘mitaga oziq-ovqat mahsulotlari, dori vositalari va BADlar bo‘yicha 2 345 ta murojaat kelib tushgan.
Shundan 337 tasi (14 foizi) aynan biologik faol yoki oziq-ovqat qo‘shimchalari bilan bog‘liq bo‘lgan. Murojaatlarning asosiy qismi televideniye, radio va ijtimoiy tarmoqlardagi reklamalarga ishonib, BADlarni xarid qilganlik va ularning kutilgan natijani bermaganligi yoki salomatlikka salbiy ta’sir ko‘rsatganligi bilan bog‘liq.
Eslatib o‘tamiz, biologik faol qo‘shimchalar dori vositasi hisoblanmaydi va kasalliklarni davolash uchun mo‘ljallanmagan. Ular organizm funksiyalarini qo‘llab-quvvatlash yoki ayrim kasalliklarning oldini olish uchun profilaktika maqsadida qo‘llaniladi.
Shu sababli har qanday qo‘shimchani qabul qilishdan oldin shifokor bilan maslahatlashish muhim. Qo‘mita aholini quyidagilarga e’tibor qaratishga chaqiradi: biologik faol qo‘shimchalarni dori sifatida ko‘rsatuvchi reklamalarga ishonmang; "Bir oyda barcha kasalliklardan xalos qiladi" kabi yolg‘on va’dalarga aldanmang; faqat Sog‘liqni saqlash vazirligi tomonidan tasdiqlangan va rasmiy sertifikatga ega mahsulotlardan foydalaning.
