Sirdaryoda to‘ylar dabdabasiz o‘tkazilishi muhokama qilindi
Sirdaryo viloyatida to‘y va marosimlarni me’yorda o‘tkazish, ortiqcha dabdaba va isrofgarchilikka chek qo‘yish masalasi muhokama qilindi. Bu haqda Zamin.uz xabar berdi.
Ushbu mavzu bo‘yicha o‘tkazilgan yig‘ilishda viloyat hokimi Erkinjon Turdimov rahbarlar, mansabdorlar va tadbirkorlarni xalqqa o‘rnak bo‘lishga chaqirdi. U to‘ylar va marosimlar faqatgina baxt va duoi xayr kuni sifatida nishonlanishi lozimligini ta’kidladi.
Hokimning fikriga ko‘ra, ayrim holatlarda to‘y va marosimlarda ortiqcha hashamat va ko‘z-ko‘z qilish holatlari kuzatilmoqda. Bu esa jamiyatda noto‘g‘ri tamoyillar shakllanishiga olib keladi.
U Mahmudxo‘ja Behbudiyning 1914 yilda "Oyna" jurnalida yozgan maqolasini eslatib, isrofgarchilikning ma’naviy va iqtisodiy zararlarini qayd etdi. Behbudiyning bir asr oldin aytgan so‘zlari bugungi kunda ham dolzarbligini yo‘qotmaganini ta’kidladi.
Erkinjon Turdimov hokimlar va mas’ul shaxslar o‘z to‘y va marosimlarini kamtarona o‘tkazish orqali boshqalarga amaliy namuna ko‘rsatishi shartligini qayd etdi. Uning so‘zlariga ko‘ra, jamiyatda maqtanish va ko‘z-ko‘z qilish kabi illatlardan voz kechish zarur.
“Biz xalqqa faqat so‘z bilan emas, balki o‘z amallarimiz bilan ham namuna bo‘lishimiz kerak”, — dedi viloyat hokimi. Yig‘ilish davomida to‘y va marosimlar uchun belgilangan qoidalarga rioya etish, isrofgarchilikning oldini olish va jamoatchilik nazoratini kuchaytirish bo‘yicha aniq vazifalar belgilandi.
Ushbu chora-tadbirlar orqali to‘ylarni ortiqcha dabdabalardan xoli o‘tkazish va jamiyatda sog‘lom muhitni shakllantirish maqsad qilingan.
