18 ta bank qonunbuzarlik uchun jarimaga tortildi

Markaziy bank sentyabr va oktyabr oylarida tijorat banklarining rasmiy veb-saytlarida axborot joylashtirish tartibiga oid monitoring o‘tkazdi. Bu haqda Zamin.uz xabar berdi.

Ushbu tekshiruv natijalari e’lon qilindi va qator qonunbuzarliklar aniqlandi. Monitoring davomida "Davlat tili haqida"gi Qonun talablariga rioya qilmaslik, axborotni to‘liq va oshkora taqdim etmaslik holatlari 18 ta bankda qayd etildi.

Bu banklarning har biri 102 million so‘m miqdorida jarimaga tortildi. Aniqlanishicha, ayrim banklar o‘z rasmiy saytlari orqali davlat tilida ma’lumot bermagan yoki kredit garovlarini bosqichma-bosqich chiqarish tartibi haqida axborotni e’lon qilmagan.

Qonunbuzarliklar quyidagi banklarda qayd etilgan: Agrobank, Anor Bank, Hayot Bank, Universal Bank, Garant Bank, Asakabank, Turonbank, Infinbank, Mikrokreditbank, Trustbank, Madad Invest Bank, Saderat Bank, Orient Finans Bank, Ipoteka Bank, Tenge Bank, Ziraat Bank Uzbekistan, AVO Bank va Open Bank. Markaziy bank tijorat banklariga qonun talablariga qat’iy rioya etish va aholiga taqdim etiladigan ma’lumotlarni to‘liq, aniq hamda ochiq shaklda joylashtirish zarurligini yana bir bor eslatdi.

Ushbu talablar banklar faoliyatining shaffofligini ta’minlash va mijozlar huquqlarini himoya qilishga qaratilgan.