Prezident Shavkat Mirziyoyev raisligida o‘tgan yig‘ilishda sog‘liqni saqlash sohasida xususiy sektorni qo‘llab-quvvatlashga qaratilgan yangi qarorlar qabul qilindi. Bu haqda Zamin.uz xabar berdi.
Ushbu qarorlarga ko‘ra, xususiy klinikalar uchun tibbiy uskunalar, jihozlar va tez yordam mashinalarini olib kirishda berilgan bojxona imtiyozlari muddati yana uch yilga uzaytirildi. So‘nggi yillarda O‘zbekistonda xususiy tibbiyot sezilarli darajada rivojlandi.
O‘tgan sakkiz yil ichida xususiy klinika va laboratoriyalar soni uch barobarga oshib, bugungi kunda 9 mingdan ortiq muassasaga yetdi. Ushbu klinikalarda 57 mingdan ortiq shifo o‘rinlari mavjud bo‘lib, mamlakatdagi tibbiy xizmatlarning 30 foizi aynan xususiy sektor tomonidan ko‘rsatilmoqda.
Davlat rahbari bu rivojlanishni ijobiy baholab, xususiy tibbiyot sohasida ilg‘or tashabbuslar paydo bo‘layotganini ta’kidladi. Shu bilan birga, hukumat xususiy sektor bilan sheriklikni kengaytirishga tayyor ekanini bildirdi.
Bundan tashqari, kelgusida bemorlar tibbiy sug‘urta mablag‘larini o‘zlari tanlagan, xizmatlari arzon va sifatli bo‘lgan xususiy klinikalarga yo‘naltirish imkoniyatiga ega bo‘ladilar. Yig‘ilishda umumiy ovqatlanish korxonalariga taqdim etilgan QQS qaytarish imtiyozi xususiy tibbiyot muassasalariga ham tatbiq etilishi e’lon qilindi.
Shuningdek, zamonaviy ko‘p tarmoqli klinikalarni tashkil etish va jihozlash uchun tadbirkorlarga 200 million dollarlik imtiyozli moliyaviy resurs ajratilishi belgilandi. Ushbu mablag‘lar 7 yil muddatga, 3 yil imtiyozli davr bilan va 17 foizlik stavkada beriladi.
Ushbu chora-tadbirlar xususiy tibbiyotning yanada rivojlanishiga xizmat qiladi va aholiga sifatli hamda arzon tibbiy xizmatlarni kengroq taqdim etish imkonini beradi. Manba: One.uz.
