Tibbiyotdagi islohotlar: umr ko‘rish davomiyligi oshdi
O‘zbekiston Prezidenti Shavkat Mirziyoyev mamlakat tibbiyot sohasining rivojlanishiga munosib hissa qo‘shgan shifokorlarni davlat mukofotlari – orden va medallar bilan taqdirladi. Bu haqda Zamin.uz xabar berdi.
Ushbu taqdirlanganlar orasida xorijda tahsil olib, keyinchalik O‘zbekistonga qaytib faoliyat yuritayotgan yosh mutaxassislar ham bor. Davlat rahbari 600 mingdan ortiq tibbiyot xodimlariga minnatdorlik bildirib, so‘nggi yillarda sog‘liqni saqlash tizimida amalga oshirilgan islohotlar natijalarini yuqori baholadi.
Jumladan, mamlakat miqyosida 45 ta tumanda buyrak ko‘chirib o‘tkazish operatsiyalari yo‘lga qo‘yilgani alohida e’tirof etildi. So‘nggi yillarda tibbiyot sohasi uchun 230 trillion so‘m mablag‘ ajratilib, uning 45 trillion so‘mi aynan joriy yilga to‘g‘ri kelmoqda.
Bu raqam 2016 yilga nisbatan 6 barobar ko‘pdir. Shu davr mobaynida hududlarda 187 ta yangi shifoxona va poliklinikalar tashkil etildi, 1 244 ta tibbiyot muassasasi ta’mirlanib, zamonaviy texnologiyalar bilan jihozlandi.
Birlamchi tibbiy xizmat ko‘rsatish imkoniyatlari 60 foizga oshirildi. Toshkent shahrida joriy etilgan 400 dan ortiq murakkab tashxis va davolash usullari endilikda butun mamlakat bo‘ylab tatbiq qilinmoqda.
Natijada, O‘zbekistonda aholining o‘rtacha umr ko‘rish davomiyligi sezilarli darajada oshdi. Erkaklarda bu ko‘rsatkich 71 yoshdan 73 yoshgacha yetgan bo‘lsa, ayollarda 76 yoshdan 77,5 yoshgacha ko‘tarildi.
Manba: zamin.uz
