10-noyabr kuni Toshkent shahri havo ifloslanishi bo‘yicha dunyo shaharlarining eng ifloslari qatorida ikkinchi o‘rinni egalladi. Bu haqda Zamin.uz xabar berdi.
Bu haqda IQAir platformasi ma’lumot berdi. Ularning xabariga ko‘ra, soat 16:51 holatiga ko‘ra, Toshkent havosidagi PM 2.5 turidagi zararli zarralar konsentratsiyasi 121,6 mikrogrammni tashkil qilgan.
Bu ko‘rsatkich Jahon sog‘liqni saqlash tashkiloti belgilagan me’yordan 24 baravar yuqoridir. Mutasaddilar aholiga zarurat bo‘lmasa ko‘chaga chiqmaslikni, nafas olish tizimi bilan bog‘liq kasalliklari bor shaxslarga esa tibbiy niqob taqishni tavsiya etmoqda.
Shuningdek, uyga qaytgandan so‘ng yuz va qo‘llarni yaxshilab yuvish, xonadonlarda chang to‘planishiga yo‘l qo‘ymaslik, eshik va derazalarni yopiq tutish, xonalarni nam latta bilan tozalash tavsiya qilinmoqda. Meteorologlarning fikriga ko‘ra, bugungi vaziyat Toshkentdagi ekologik muammolarning jiddiylashayotganidan darak beradi.
Bu holat atrof-muhitni muhofaza qilish bo‘yicha chora-tadbirlarni kuchaytirish zaruratini yana bir bor eslatmoqda.
