O‘zbekistonda tibbiyot xodimlarining malakasini oshirish uchun yangi tizim joriy etilishi rejalashtirilmoqda. Bu haqda Zamin.uz xabar berdi.
Bu haqda prezident Shavkat Mirziyoyev respublika shifokorlari bilan uchrashuvda ma’lum qildi. Davlat rahbari ta’kidlaganidek, zamonaviy shifokor har doim yangi texnologiyalar, davolash va diagnostika usullari bilan tanish bo‘lishi, o‘z bilim va ko‘nikmalarini muntazam ravishda oshirib borishi lozim.
Shu maqsadda mamlakatda Uzluksiz professional tibbiy ta’lim markazini tashkil etish rejalashtirilgan. 2026-yildan boshlab masofaviy ta’lim, simulyatorlarda amaliy mashg‘ulotlar va mustaqil o‘qish imkoniyatlari yo‘lga qo‘yiladi.
O‘tgan sakkiz yil ichida xususiy klinikalar soni uch barobarga oshib, 9 mingdan ortdi. Shuningdek, yotoq o‘rinlari soni 57 mingga yetdi.
Bugungi kunda tibbiy xizmatlarning 30 foizi xususiy sektor tomonidan taqdim etilmoqda. Prezident ushbu hamkorlikni yanada kengaytirish zarurligini ta’kidladi.
Davlat rahbari xususiy klinikalardagi xizmat narxlari respublika markazlariga qaraganda arzonroq ekanini qayd etdi. Shu munosabat bilan, davlat muassasalaridagi narxlarning adolatli bo‘lishini ta’minlash maqsadida ularni qayta ko‘rib chiqish topshirildi.
Manba: zamin.uz
