O‘zbekiston sud amaliyotida ekologik jinoyatlar bilan bog‘liq xavotirli holatlar aniqlangan. Bu haqda Zamin.uz xabar berdi.
2024-yil va 2025-yilning birinchi yarmida tabiatni muhofaza qilish qoidalarini buzish bilan bog‘liq 220 ta jinoyat ishi ko‘rib chiqilgan. Ushbu ishlar bo‘yicha 403 nafar shaxs ayblanuvchi sifatida jalb etilgan, ulardan 393 nafari sud hukmi bilan javobgarlikka tortilgan.
Qolgan 7 ta ish esa turli sabablarga ko‘ra yopilgan. Tahlillar shuni ko‘rsatadiki, eng ko‘p uchrayotgan ekologik jinoyatlar flora va fauna qonunlarini buzish bilan bog‘liq.
2024-yilda hayvonot va o‘simlik dunyosidan foydalanish qoidalarini buzganlik uchun 116 kishi javobgarlikka tortilgan bo‘lsa, 2025-yilning dastlabki olti oyida yana 77 kishi sudlangan. Shuningdek, ekinlar, o‘rmonlar va boshqa o‘simliklarni zarar yetkazish yoki yo‘q qilish bilan bog‘liq jinoyatlar ham ko‘p uchraydi.
2024-yilda bunday jinoyatlar uchun 73 kishi, 2025-yilning birinchi yarmida esa 21 kishi javobgarlikka tortilgan. Geografik jihatdan Qoraqalpog‘iston Respublikasi ekologik jinoyatlar bo‘yicha yetakchi bo‘lib, 2024-yilda mamlakatdagi umumiy holatlarning 15 foizini tashkil etgan.
Jizzax va Sirdaryo viloyatlari 12 foizdan, Surxondaryo 11 foiz, Farg‘ona viloyati esa 10 foiz ulush bilan keyingi o‘rinlarda qayd etilgan. 2025-yilning birinchi yarmida esa Qoraqalpog‘iston (26 foiz) va Samarqand viloyati (23 foiz) yuqori ko‘rsatkichni qayd etgan.
Shuningdek, ekologiya sohasidagi ma’muriy huquqbuzarliklar ham ko‘rib chiqilgan. Bir yarim yil ichida 2466 ta ma’muriy ish bo‘yicha 2478 shaxs javobgarlikka tortilgan.
Ushbu ishlarning yarmi Qoraqalpog‘iston, Buxoro, Samarqand, Sirdaryo va Toshkent viloyatlarida qayd etilgan. Mazkur ma’lumotlar ekologik jinoyatlarning oldini olish va chora-tadbirlarni kuchaytirish zarurligini ko‘rsatadi.
Ayniqsa, Qoraqalpog‘iston va Samarqand viloyatlaridagi vaziyatga alohida e’tibor qaratish lozim. Shu bilan birga, «Yashil makon» umummilliy loyihasi doirasida ekologik vaziyatni yaxshilash bo‘yicha amaliy ishlar olib borilmoqda.
2025-yil bahorida mamlakat bo‘ylab 137 million daraxt va buta ko‘chatlari ekilgan. Bu tadbir ekologik muammolarni kamaytirish va iqlim o‘zgarishining salbiy ta’sirlariga qarshi kurash strategiyasining muhim qismi hisoblanadi.
