O‘zbekiston Pensiya jamg‘armasi matbuot xizmati fuqarolarning mehnat daftarchasini raqamlashtirish jarayoni bo‘yicha ko‘p beriladigan savollarga izoh berdi. Bu haqda Zamin.uz xabar berdi.
Unga ko‘ra, hozirda ishsiz bo‘lgan fuqarolar o‘z mehnat daftarchasini raqamlashtirish uchun yashash joyidagi tuman bandlik bo‘limlariga murojaat qilishlari mumkin. Agar fuqaro ishlayotgan bo‘lsa, u o‘zining ish joyidagi kadrlar bo‘limiga murojaat qilib, mehnat daftarchasidagi ma’lumotlarni “Yagona milliy mehnat tizimi”ga (my.mehnat.uz) kiritishni so‘rashi lozim.
Shuningdek, fuqarolar o‘z ma’lumotlarini mazkur tizimga mustaqil tarzda ham kiritish imkoniga ega. Buning uchun elektron raqamli imzodan foydalanib, tizimga jismoniy shaxs sifatida kirish kifoya.
Bundan tashqari, mehnat daftarchasini raqamlashtirish xizmati O‘zbekiston fuqarolari uchun mutlaqo bepul taqdim etilishi ma’lum qilindi. Bu jarayon fuqarolarning huquqlarini himoya qilish va qulaylik yaratishga qaratilgan.
Manba: zamin.uz.
