Toshkent shahrida chiqindi xizmatlari uchun qarzdorlikka ega bo‘lgan 6 ming abonentning elektr energiyasiga to‘lov qilish imkoniyati vaqtincha cheklab qo‘yildi. Bu haqda Zamin.uz xabar berdi.
Ushbu chora shaharda chiqindi xizmatlari bo‘yicha yuzaga kelgan qarzdorlikni bartaraf etish maqsadida amalga oshirildi. Joriy yilning 5-noyabr kuni 25 mingdan ortiq abonentga “2100” qisqa raqamidan SMS orqali xabar yuborilgan.
Ogohlantirilgandan so‘ng, 5 kun ichida qarzdorlikni bartaraf etmagan 6 ming abonentning elektr to‘lov qilish imkoniyati vaqtinchalik to‘xtatildi. Hozirda Toshkent shahrida chiqindi xizmatlari bo‘yicha umumiy qarzdorlik miqdori 582 million so‘mdan oshadi.
Qarzdorlik to‘liq to‘langanidan so‘ng, cheklovlar avtomatik ravishda bekor qilinadi va abonentlarning to‘lov imkoniyati qayta tiklanadi. Ushbu tartib dekabr oyidan boshlab respublikaning boshqa hududlarida ham qo‘llanilishi rejalashtirilgan.
Bu chora aholining xizmatlar uchun qarzdorlikni o‘z vaqtida to‘lashini rag‘batlantirishga qaratilgan. Manba: zamin.uz
