O‘zbekiston va Rossiya prezidentlari hamkorlikni muhokama qildi
O‘zbekiston va Rossiya prezidentlari telefon orqali muloqot qilib, ikki davlat o‘rtasidagi strategik sheriklikni yanada rivojlantirish masalalarini muhokama qildilar. Bu haqda Zamin.uz xabar berdi.
Bu haqda Prezident matbuot xizmati xabar berdi. Suhbat davomida Shavkat Mirziyoyev va Vladimir Putin avval erishilgan kelishuvlarni amalga oshirish va ularni yangi bosqichga olib chiqish yo‘llarini ko‘rib chiqdilar.
Shuningdek, iqtisodiyotning ustuvor yo‘nalishlarida, xususan energetika sohasida qo‘shma loyihalarni jadallashtirish zarurligiga alohida e’tibor qaratdilar. Prezidentlar tovar ayirboshlash hajmini barqaror saqlash, hududlar o‘rtasidagi ishbilarmonlik aloqalarini rivojlantirish, shuningdek, madaniy-gumanitar sohadagi hamkorlikni kengaytirish muhim ekanini ta’kidladilar.
Muloqotda Moskva viloyatida o‘tgan O‘zbekiston va Rossiya hududlari kengashining ikkinchi yig‘ilishi yuqori saviyada tashkil etilgani va uning natijalari samarali bo‘lgani qayd etildi. Shu bilan birga, 3-dekabr kuni O‘zbekiston–Rossiya Hukumatlararo komissiyasining navbatdagi yig‘ilishi va uning doirasida rejalashtirilgan biznes forumni muvaffaqiyatli o‘tkazish zarurligi ham muhokama qilindi.
Prezidentlar xalqaro va mintaqaviy ahamiyatga ega masalalar bo‘yicha fikr almashib, yaqin muddatda rejalashtirilgan qo‘shma tadbirlarni muhokama qildilar. Suhbat do‘stona va konstruktiv ruhda o‘tgani ma’lum qilindi.
