O‘zbekiston va Vengriya ekstraditsiya shartnomasini tasdiqladi
Oliy Majlis Qonunchilik palatasi deputatlari O‘zbekiston va Vengriya o‘rtasida jinoyatchilarni ekstraditsiya qilish bo‘yicha shartnomani ratifikatsiya qilish haqidagi qonun loyihasini ma’qulladi. Bu haqda Zamin.uz xabar berdi.
Ushbu hujjat 2025-yil 20-may kuni Budapesht shahrida imzolangan edi. Hozirga qadar O‘zbekiston va Vengriya o‘rtasida jinoyatchilarni ekstraditsiya qilishga oid maxsus shartnoma mavjud emas edi.
Yangi kelishuv 26 moddadan iborat bo‘lib, jinoyat sodir etishda gumon qilinayotgan yoki sud hukmi chiqarilgan shaxslarni ikki davlat o‘rtasida qanday shartlar asosida topshirish mumkinligini belgilaydi. Ushbu shartnoma kuchga kirgach, ikki davlatning huquqni muhofaza qilish organlari o‘rtasidagi hamkorlik yanada mustahkamlanadi.
Bu jinoyatlarni tergov qilish va aybdorlarni javobgarlikka tortishda samaradorlikni oshiradi. Shu bilan birga, shartnoma jinoyatchilarning javobgarlikdan qochib qutulishining oldini olishda muhim ahamiyat kasb etadi.
Deputatlar bu hujjatni tasdiqlash orqali huquqiy hamkorlikni kuchaytirishga e’tibor qaratganliklarini ta’kidladilar. Mazkur qonun loyihasi endilikda ko‘rib chiqish uchun Senatga yuborildi.
