O‘zbek-Amerika biznes kengashi tashkil etildi
O‘zbekiston Prezidenti Shavkat Mirziyoyev O‘zbek-Amerika biznes va investitsiya kengashini tashkil etish haqidagi farmonni imzoladi. Bu haqda Zamin.uz xabar berdi.
Mazkur hujjat davlat rahbarining rasmiy saytida e’lon qilindi. Yangi kengashning ishtirokchilarini tasdiqlash va uning faoliyatini muvofiqlashtirish vazifasi Prezident Administratsiyasi rahbari Saida Mirziyoyevaga yuklatildi.
Kengashning asosiy vazifalari yirik savdo va investitsiya loyihalarini muvofiqlashtirishdan iborat bo‘ladi. Shu bilan birga, O‘zbekiston iqtisodiyotiga qo‘shimcha mablag‘larni jalb qilish maqsadida maxsus investitsiya jamg‘armasi tashkil etilishi rejalashtirilmoqda.
Bu borada Xalqaro moliyaviy rivojlanish korporatsiyasi (DFC) va boshqa global moliyaviy tashkilotlar asosiy investor sifatida ishtirok etishi mumkin. Kengash strategik va infratuzilma loyihalarini rivojlantirish, o‘zaro savdo tariflarini kamaytirish hamda IT Park rezidentlari tomonidan ishlab chiqarilgan IT mahsulotlarini targ‘ib qilish bilan shug‘ullanadi.
Shuningdek, mamlakat investitsiya portfelini diversifikatsiyalash bo‘yicha takliflar ishlab chiqiladi. Bundan tashqari, O‘zbekiston Markaziy bankining valyuta zaxiralarini samarali boshqarish masalalari ham muhokama qilinadi.
2024-yildan boshlab O‘zbekistonning AQShdagi elchixonasida yangi lavozim – maslahatchi-elchi tashkil etiladi. Ushbu maslahatchi ikki davlat o‘rtasidagi savdo va investitsiya loyihalarini amalga oshirish uchun mas’ul bo‘ladi.
