Farg‘ona viloyatida jamoat transporti tizimini yaxshilash maqsadida yangi avtobuslar olib kelindi. Bu haqda Zamin.uz xabar berdi.
Viloyat hokimligi matbuot xizmatining xabariga ko‘ra, “Fergana City Bus” MChJ tomonidan Xitoyda ishlab chiqarilgan 24 ta zamonaviy “Zhong tong” avtobusi xarid qilindi. Ushbu avtobuslar yaqin kunlarda Farg‘ona shahridagi yo‘nalishlarda aholiga xizmat ko‘rsatishni boshlaydi.
Yangi avtobuslar ekologik jihatdan toza, energiya tejamkor va yo‘lovchilar uchun qulay sharoitlarga ega. Bu esa jamoat transportidan foydalanish imkoniyatlarini yanada yaxshilashga xizmat qiladi.
Shuningdek, 2024–2025-yillar davomida viloyatdagi boshqa to‘rtta korxona tomonidan Asia Star, Yutong va Zhong tong rusumidagi jami 96 ta avtobus olib kelinishi rejalashtirilgan. Mutaxassislarning fikricha, bu yangilanish viloyatdagi shahar transport tizimini zamonaviy, xavfsiz va qulay darajaga olib chiqadi.
Aholining transport xizmatlaridan foydalanish imkoniyatlari kengayib, jamoatchilik uchun qulayliklar yaratiladi. Mazkur chora-tadbirlar Farg‘ona viloyatida transport tizimini rivojlantirishga xizmat qiladi.
Manba: Farg‘ona viloyati hokimligi matbuot xizmati.
