Toshkent aeroportida E-Gate tizimi to‘liq ishga tushdi
Toshkent xalqaro aeroportida yo‘lovchilar uchun avtomatlashtirilgan pasport nazorati tizimi — E-Gate to‘liq ishga tushirildi. Bu haqda Zamin.uz xabar berdi.
Bu haqda Uzbekistan Airports ma’lum qildi. Endi shaxsni tekshirish jarayoni atigi 15-20 soniya davom etadi.
Mazkur tizimdan foydalanish uchun yo‘lovchi o‘zining biometrik pasportini maxsus qurilmaga qo‘yib, yuzini skaner qilishi kifoya. Yaqinda o‘tkazilgan modernizatsiya ishlari natijasida E-Gate tizimining liniyalari soni 20 taga yetkazildi.
Bu esa yo‘lovchilar oqimini tezroq va qulayroq boshqarishga imkon yaratadi. Mazkur chora aeroportda xizmat sifatini oshirish va yo‘lovchilarga yanada qulay sharoit yaratish maqsadida amalga oshirildi.
Ma’lumki, E-Gate tizimi Toshkent xalqaro aeroportida ilk bor 2023 yilda xalqaro terminalning jo‘nash zalida ishga tushirilgan edi.
