O‘zbekiston hukumati tibbiyot muassasalarida pullik xizmatlar ko‘rsatish tartibini tasdiqladi. Bu haqda Zamin.uz xabar berdi.
Bu haqda Adliya vazirligi matbuot xizmati ma’lum qildi. Yangi tartibga ko‘ra, agar bemor rejalashtirilgan tibbiy yordam olish uchun yo‘llanmasiz va o‘z tashabbusi bilan murojaat qilsa, ushbu xizmatlar pullik asosda ko‘rsatiladi.
Bunda bemor tibbiyot muassasasida albatta ro‘yxatdan o‘tkazilishi talab etiladi. Bundan tashqari, poliklinikalarda bepul kafolatlangan xizmatlar paketiga kirmaydigan barcha tibbiy xizmatlar qo‘shimcha xizmatlar hisoblanadi va ular uchun to‘lov amalga oshirilishi lozim.
Bemorni qabul qilishdan avval to‘liq oldindan to‘lov qilinishi shart. Shundan so‘ng bemor tegishli shifokorga yo‘naltiriladi.
Ma’lumki, O‘zbekiston Prezidenti Shavkat Mirziyoyev respublika tibbiy xizmatlari narxini qayta ko‘rib chiqish tashabbusini ilgari surgan edi. Davlat rahbari tibbiy sug‘urta mablag‘larini sifatli va arzon xizmatlar ko‘rsata oladigan xususiy klinikalarga yo‘naltirishni taklif qilgan.
