O‘zbekistonning mehnat migratsiyasi tajribasi MDHga taklif qilindi
O‘zbekiston va Tojikistonning tashkiliy mehnat migratsiyasi borasidagi tajribasini MDH mamlakatlariga kengroq yoyish taklif qilindi. Bu haqda Zamin.uz xabar berdi.
Ushbu tashabbus Rossiyada inson huquqlari bo‘yicha vakil Tatyana Moskalkova tomonidan ilgari surilgan. Tatyana Moskalkovaning ta’kidlashicha, bu tashabbusni amalga oshirish uchun MDH davlatlari o‘rtasida tegishli kelishuvlar imzolanishi mumkin.
Rasmiy ma’lumotlarga ko‘ra, 2025 yil boshidan boshlab tashkiliy yollash yo‘li bilan Rossiyaga 106 ming nafar o‘zbekistonlik ishchi yuborilgan. Ulardan 50 ming nafari Rossiyaning yirik korxonalarida mehnat qilmoqda.
Shuningdek, 2023 yil bilan solishtirganda, O‘zbekistondan tashkiliy yollash orqali Rossiyaga yuborilgan ishchilar soni 4,2 barobar oshgan. Shu bilan birga, mustaqil ravishda ish topgan o‘zbekistonliklar soni bir yil ichida deyarli ikki barobarga kamayib, 700 ming kishini tashkil etdi.
Mazkur tendensiyalar mamlakatlararo mehnat migratsiyasini tartibga solish va o‘zaro hamkorlikni rivojlantirish zarurligini ko‘rsatadi. Manba: Zamin.uz
