Ortiqcha ish uchun to‘lov tartibi o‘zgardi
O‘zbekiston Adliya vazirligi mamlakatda ortiqcha ishlash uchun ish haqi tizimi qayta ko‘rib chiqilganini ma’lum qildi. Bu haqda Zamin.uz xabar berdi.
Yangi tartibga ko‘ra, ish vaqtidan tashqari dastlabki ikki soat uchun ish haqi 1,5 baravar ko‘paytirib to‘lanadi, undan keyingi soatlar uchun esa bu miqdor 2 baravar qilib belgilandi. Avval amalda bo‘lgan qonunlarga binoan, ortiqcha ishlash uchun ish haqi kamida ikki baravar miqdorda to‘lanishi talab etilardi.
Endilikda esa bu qoidalar o‘zgartirildi. Shuningdek, Mehnat kodeksidagi yiliga 120 soat ortiqcha ishlash cheklovi ham bekor qilindi.
Bu o‘zgarishlar xodimlarning mehnatini yanada moslashuvchan va samarali boshqarishga yo‘naltirilgan. Bundan tashqari, xususiy bandlik agentliklariga yangi imkoniyatlar berildi.
Ular endilikda kasblar va chet tillarini o‘rgatish bo‘yicha mustaqil kurslar tashkil etishi mumkin. Shuningdek, agentliklar o‘z zaxira mablag‘larini bank depozitlariga joylashtirish orqali daromad olish va bu mablag‘larni erkin boshqarish huquqiga ega bo‘ldi.
Mazkur o‘zgarishlar mehnat sohasini yanada modernizatsiya qilish va iqtisodiy faollikni oshirishga qaratilgan. Manba: Zamin.uz
