Toqayev Toshkentga tashrif buyurdi, muzokaralar kutilmoqda
Qozog‘iston Prezidenti Qasim-Jomart Toqayev davlat tashrifi bilan Toshkent shahriga yetib keldi. Bu haqda Zamin.uz xabar berdi.
Uni Toshkentdagi yangi xalqaro "Toshkent-Humo" aeroportida tantanali ravishda kutib olishdi. Toqayev ushbu zamonaviy aeroportga tashrif buyurgan birinchi davlat rahbari bo‘ldi.
Aeroportda O‘zbekiston Prezidenti Shavkat Mirziyoyev va Qozog‘iston Prezidenti Qasim-Jomart Toqayev o‘rtasida qisqa suhbat bo‘lib o‘tdi. Uchrashuv davomida ikki davlat o‘rtasidagi strategik sheriklik va yaqin ittifoqchilikni yanada rivojlantirish masalalari muhokama qilindi.
Ushbu suhbat ikki tomonlama munosabatlarni mustahkamlashda muhim ahamiyatga ega bo‘ldi. Tashrif davomida rasmiy tadbirlar ham rejalashtirilgan.
Xususan, 15-noyabr kuni oliy darajadagi muzokaralar hamda O‘zbekiston va Qozog‘iston o‘rtasida tashkil etilgan Oliy davlatlararo kengashning ikkinchi yig‘ilishi o‘tkazilishi kutilmoqda. Ushbu uchrashuvlar ikki mamlakat o‘rtasidagi hamkorlikni yangi bosqichga olib chiqishi va muhim kelishuvlarga erishilishi uchun zamin yaratishi kutilmoqda.
