2025-yilda metan, oziq-ovqat va xizmatlar qimmatlashdi

O‘zbekiston iste’mol bozorida 2025-yil oktyabr oyida narxlar o‘zgarishida jiddiy tendensiyalar kuzatildi. Bu haqda Zamin.uz xabar berdi.

Markaziy bank ma’lumotlariga ko‘ra, ayrim tovar va xizmatlar narxi sezilarli darajada oshgan, ba’zilari esa pasaygan. Xususan, metan narxi yillik hisobda 30,5 foizga oshgani qayd etildi.

Bu o‘zgarish aholining kundalik hayotida eng sezilganlardan biri bo‘ldi. Shuningdek, benzin narxi 11,7 foizga, nikoh uzugi 33,4 foizga, gazeta va jurnallar 15,3 foizga, sigaretlar 9,6 foizga, tabiiy gullar esa 9,8 foizga qimmatlagan.

Biroq ayrim mahsulotlarda narxlar pasayishi kuzatildi. Masalan, propan 18 foizga arzonlashgan, konditsionerlar 1,3 foizga, televizorlar 0,3 foizga, qog‘oz esa 3,9 foizga tushgan.

Oziq-ovqat mahsulotlari bo‘yicha ayrim mahsulotlar narxi keskin oshgan. Masalan, suyaksiz mol go‘shti 25,3 foizga, karam 24,7 foizga, kungaboqar yog‘i 22,6 foizga, piyoz esa 18,9 foizga qimmatlagan.

Shu bilan birga, ayrim mahsulotlar arzonlashgan: shaftoli narxi 28,7 foizga, tarvuz 21,8 foizga, guruchning ikki turi 18 foizga, bodring va banan mos ravishda 17,6 va 15,1 foizga tushgan. Xizmatlar sohasida ham o‘zgarishlar kuzatilgan.

Pul o‘tkazmalari 4,8 foizga, mikromoliyaviy xizmatlar 0,2 foizga arzonlashgan. Lekin davlat bog‘chalari narxi 21 foizga, markaziy isitish 20,9 foizga, elektr ta’minoti esa 18,8 foizga ko‘tarilgan.

Bundan tashqari, ichki aviareyslar narxi 52,3 foizga, tarmoq gazi 39,2 foizga, sovuq suv 35,1 foizga, muzey xizmatlari 32,3 foizga, chiqindi tashlash 28,6 foizga, suyultirilgan gaz esa 25 foizga oshgan. Shahar avtobuslari yo‘l haqi ham 22,3 foizga ko‘tarilgan.

Shu bilan birga, mamlakatda yillik inflyatsiya 7,8 foizga tushib, o‘tgan yilga nisbatan 2,4 foiz punktga kamaygani qayd etilgan. Mutaxassislar bu o‘zgarishlarni mavsumiy omillar, xomashyo narxlari va ta’minot tizimidagi holatlar bilan bog‘lamoqda (manba: one.uz).