Qanot Sharq aviakompaniyasi Toshkent – London – Toshkent yo‘nalishida muntazam aviaqatnovlarni yo‘lga qo‘yishini rasman e’lon qildi. Bu haqda Zamin.uz xabar berdi.
Bu haqda O‘zbekiston Transport vazirligi ma’lum qildi. Mazkur qatnovlar 2025-yil 15-dekabrdan boshlab amalga oshiriladi.
Parvozlar haftasiga ikki marta – dushanba va payshanba kunlari bajariladi. Ular uchun zamonaviy Airbus A321-XLR samolyotlari qo‘llaniladi.
Ushbu samolyotlar aviakompaniya tomonidan yangi qo‘shilgan model hisoblanadi. Buyuk Britaniyada samolyotlar Londondagi Gatvik xalqaro aeroportiga (LGW) qo‘nadi.
Mazkur yo‘nalishning yo‘lga qo‘yilishi O‘zbekiston va Buyuk Britaniya o‘rtasida aviaaloqalarni rivojlantirish maqsadida erishilgan kelishuvlar doirasida amalga oshirilmoqda. Shuningdek, avvalroq Centrum Air aviakompaniyasi Toshkentdan Maldiv orollariga parvozlarni yo‘lga qo‘ygani haqida xabar berilgan edi.
Bu kabi tashabbuslar O‘zbekistonning xalqaro aviaqatnovlarini kengaytirish borasidagi sa’y-harakatlarini yana bir bor tasdiqlaydi.
